मध्यराति ठुलो दुर्घटना, १२ जनाको निधन २२ जना घाइते

मध्यराति ठुलो दुर्घटना, १२ जनाको निधन २२ जना घाइते

काठमाडौं । बाँकेमा आइतबार मध्यराति रोकिराखेको ट्रकमा फोर्स गाडी ठोक्किँदा मृत्यु हुनेको संख्या १२ पुगेको छ। बाँके जिल्ला प्रहरी कार्यालयले दिएको जानकारीअनुसार घाइते २२ जनामध्ये १ जनाको उपचारका क्रममा सोमबार बिहान मृत्यु भएपछि मृतकको संख्या १२ पुगेको हो।

बाँके जिल्ला ट्राफिक प्रहरी कार्यालयका प्रमुख प्रहरी निरीक्षक पविन्द्र बमका अनुसार मृतकमा ११ पुरुष र १ महिला छन्। ‘तर उनीहरूको नाम ठेगाना अहिले खुलिसकेको छैन,’ नेपालखबरसँग उनले भने।

२१ घाइतेमध्ये तीन जनाको अवस्था गम्भीर रहेको उनले जानकारी दिए। घाइतेमध्ये २० पुरुष र १ महिला छन्। उनका अनुसार नेपालगन्जबाट सल्यान जाँदै गरेको बा ५ ख ५९९५ नम्बरको फोर्स गाडी रोकिराखेको ना ४ ख ९०६४ नम्बरको ट्रकमा राति १२ बजेतिर ठोक्किएको हो।

घाइतेहरुलाई भेरी अस्पताल लगिएको छ। शव पनि त्यही अस्पतालको शव गृहमा राखिएको छ। मृतकको सनाखत हुन बाँकी रहेको प्रहरीले जनाएको छ।

दुर्घटनामा परेको फोर्स गाडीमा भारतका विभिन्न सहरबाट घर फर्किँदै गरेका ३३ जना थिए। उनीहरुलाई नेपालगन्ज नाकाबाट उद्धार गरेर सल्यानतर्फ पठाइँदै थियो।