नेपाली सेनाद्वारा नेपाल प्रहरीलाई ३ सय नाल हतियार हस्तान्तरण

नेपाली सेनाद्वारा नेपाल प्रहरीलाई ३ सय नाल हतियार हस्तान्तरण

काठमाडौँ– नेपाली सेनाले नेपाल प्रहरीलाई सरकारको निर्णय बमोजिम पहिलो चरणमा ३ सय थान हतियार उपलब्ध गराएको छ ।

प्रधानसेनापति पूर्णचन्द्र थापाले सोमबार जंगी अड्डामा आयोजित एक कार्यक्रममा बीच प्रहरी महानिरीक्षक शैलेश थापा क्षेत्रीलाई पहिलो चरणमा ३ सय थान हतियार र गोली तथा सामाग्री हस्तानान्तरण गरेका छन् ।

सैनिक जनसम्पर्क तथा सूचना निर्देशनलायका अनुसार नेपाल प्रहरीलाई तालिम, विशिष्ट र अति विशिष्ट व्यक्ति सुरक्षा, कार्यालय सुरक्षा तथा ठूला कार्यक्रमहरु संचालन गर्ने प्रयोजनका लागि भनी नेपाल सरकार, मन्त्रिपरिषद्को २०७८ जेष्ठ १७ गतेको निर्णय बमोजिम नेपाली सेनाले कुनै पनि मूल्य नलिई हतियार हस्तानान्तरण गरेको हो ।

सेनाले प्रहरीलाई विभिन्न प्रकारका राइफल र मेशिन गनहरु गरी १० हजार ८ सय १८ नाल र सोको एम्युनिशन गोटा १४ लाख ९४ हजार १६ उपलब्ध गराउने छ ।

हतियार तथा एम्युनिशन तीन चरणमा उपलव्ध गराउने योजना अनुसार बाँकी हतियार तथा एम्युनिशन २०७९ साल बैशाख महिनासम्ममा हस्तान्तरण गरिने सेनाले जनाएको छ । यस्तै उपलब्ध गराईएका हतियारहरूको मर्मत तथा प्रयोगको तालिम समेत नेपाली सेनाद्वारा नेपाल प्रहरीलाई प्रदान गर्ने योजना रहेको सेनाले जनाएको छ ।